Польска гімна, знама ай як Домбровского мазурка ( ) є штатна гімна Польской републікы, поменована по польскім народнім ґероёви Янови Генрикови Домбровскім.
Історія піснї
Оріґінална назва была „Пісня польскых леґій в Таліаньску“ (). Юзеф Выбіцкый написав текст в роцї 1797 – т. є. два рокы по тім, што третє роздїлїня Польска привело конець Польско-литовской шляхтічной републікы – в североталіаньскім містї Реджо Емілія, котре в тім часї належало до новозаложеной Цізалпіньской републікы, наполеоньскому сателітному штату. Выбіцкый там еміґровав по роздїлїнях Польска, таксамо як дакотры далшы повсталцї з Косьцюшкового повстаня. Меджі нима быв ай Ян Генрик Домбровскый, котрый дав гімнї єй днешню назву. Із згодов Наполеона зорґанізовав в роцї 1797 воєньскы зъєдинїня польскых добровольників на ослободжіня отцюзнины. То є ясне ай з гімны, коли ся в нїй споминать, же Домбровскый мать вести свої войска з Таліаньска до Польска. Найперше єднак они боёвали проти Ракушан в севернім Таліаньску на охрану новой републікы. Екзістовала надїя, же Наполеон на знак вдякы підпорить обновлїня польского штату. Намісто того в роцї 1807 заложыв Варшавске князївство, котре было лем далшым сателітним штатом Франції.
Походжіня мелодії не є знаме. Предпокладать ся, же Выбіцкый підложыв свій текст мелодіёв мазуркы, котра была популарна уж в 18. сторочу. Композіція была даякый час приписована Міхалови Клеофасови Оґіньскому, протоже ся в нїй предпокладала ёго „Marche pour les Légions polonaises“. Одколи єднак были в роцї 1938 найджены ноты той композіції, є ясне, же іде о іншу мелодію.
В роцї 1830 ся пісня співала почас новембрового повстаня, в роцї 1863 почас януарового повстаня, меджі польскыма еміґрантами, в роцї 1905 почас російской револуції, як ай почас Першой і Другой світовой войны.
„Mazurek Dąbrowskiego“ быв переложеный і співаный в 17 языках поетами, котры ся солідарно стотожнили з боюючім Польском. Почас яри народів в роцї 1848 ся Mazurek Dąbrowskiego співав на уліцях Відня, Берліна і Прагы, де ся тїшив великій популарности.
Служыла як взір (мелодія і текст) про словацького поета Сама Томашіка, котрый в роцї 1834 написав пісню „Hej Sloveni“ („Гей, Славяне“). В роцї 1848 ся в Празї одбыв Славяньскый конґрес, де была пісня „Hej Sloveni“ прията за гімну вшыткых Славян. По роцї 1945 ся пісня стала ай штатнов гімнов Югославії, дарьмо з одлишностями в темпі і на концї.
Од 26. фебруара 1927 є „Mazurek Dąbrowskiego“ офіціално штатнов гімнов Польска. Текст ся мірно одлишать од оріґіналной „Піснї польскых леґій в Таліаньску“.
Референції