Лука Демян, Дем'ян Лука Васильович, * 6. юн 1894, Вышны Верецкы, Мадярске кральовство – † 16. май 1968, Мукачово, Украина — фолклориста, писатель.Иван Поп, c. 154.Хланта І. В., сс. 114 – 115.
Биография Родив ся в худобной селянской фамилии. З той причины его школованя ограничило ся парохиалнов школов, а дале живив ся и спомагав фамилию случайныма роботами. Быв сполоченскым активистом, участником Всенародной громады угорскых Русинох в Хустѣ 21. януара 1919. В року 1920 основав в селѣ кооперацию и працовав там продавачом, од року 1928 достав роботу желѣзничаря, быв кондуктором, дозорцьом на штациях, екстерном учив ся в горожанцѣ, котру закончив в року 1932. В року 1956 пензионовав. Послѣдны три десятьроча жив в Мукачовѣ.
Творба ФолклористикаПервый период творчости Лукы Демяна ишов напрямом фолклористикы, коли од року 1908, еще учеником парохиалной школы, зачав зберати и записовати людовы спѣванкы, казкы, анекдоты, а в року 1911 в будапештской новинцѣ Недѣля появили ся его первы фолклорны записы. Дале публиковав фолклор в новинках Наука, Подкарпатська Русь, Литературна недѣля, в календарях, читанках. Плодами его зберательства стали ся 25 томы рукописных фолклорных материалох, часть из котрых передав до Киева в Инштитут теории умѣня, фолклору и етнографии,Мишанич О. В. а часть, зобрану в роках 1936–1938, в Подкарпатскый етнографичный музей в Ужгородѣ.
Довоенна доба писательстваОд зачатку 1920-х рокох зачав писати повѣданя, майже чисто на русинском языкови. Учебник Исторія подкарпаторуськой литературы, выданый в Унгварѣ в року 1942, пише: «Первый из прозаиковъ Лука Демянъ, селянинъ, выдавший двѣ малѣ книжочки „Чортъ на весѣлю“ (1920) и „Вѣдьма“ (1924). Оповѣданя сѣ написанѣ на мѣстномъ народномъ языцѣ, широко и наивно выкорыстають народнѣ погляды и суевѣрія.» Але в далшых роках ся зачинать учити на книжках украинскых писательох: во своей биографии упоминать Ивана Франка, Тимофия Бордуляка, Юрия Федьковича.Пагиря, Василь. В року 1943 выходить его третя и послѣдна довоенна книжка Изъ села (1943, выданя ПОН). Книжочка обсягуе 8 повѣдань, вшиткы из сельского живота Верховины, назва ей не одповѣдать жадному конкретному повѣданю, а лем указуе читателю на то обще окружѣня, з котрого вышли вшиткы тоты описаны автором припады. На час выданя сей книжочкы автор быв далеко не зачаточник, бо уж 22 рокы минуло было од выданя его первой книжкы. В значной мѣрѣ мож видѣти у него моцный вплыв украинской литературы, котрый проявив ся, окрем языка, в темах, де главны конфликты суть меджи прощавов и панством, а тыж меджи Русинами и «ворогами» Русинох. Язык книжкы е повный украинизмами и полонизмами, котры в том часѣ ледвы ци были доста познаты мѣстному обывательству, а бизовно, же не были хоснованы в каждоденном коммуникованю.Демян Лука: Из села
Совѣтско-украинска доба писательстваЯк и многы иншы подкарпатскы писателе, Лука Демян пережив довгый период адаптации, коли нич не публиковав и мусѣв ся адаптовати на метод соцреализма, на украинскый язык и роль писателя яко «инженера людскых душ». Але од року 1956, уже яко пензиста, прияв новый порядок и активно пише. Намѣсто протестного тона против несправедливостей свѣта, его повѣданя наповнюють ся оптимизмом. Их героями стають ся щастливы садовникы, доичкы, пестователѣ кендерицѣ, циган Ферко, котрый колись ходив з поплатаным мѣхом, а теперь жие в просторной хыжи и е признаный всѣма ковач.
Наперек тому, же усиловав ся писати по украинскы, его творы редакторами выдавательств были подданы значной украинизации. На жаль, и фолклорны записы, выданы в той добѣ, суть значно украинизованы. Повѣданя Лукы Демяна вышли в перекладах по русскы, бѣлорусскы, словацкы, чешскы.
Интересны факты Почерпнуте з meest-online.com/ В збераню фолклора и сполоченской чинности участнив ся и его брат, Иван Демян. Обое заинициовали во Вышных Верецках Просвѣту (1920), в котрой были 30 члены. В року 1922 во Вышных Верецках основали Братство терезвости, а Лука Демян там выступовав з темами газдованя и терезвости.
Жерела и одказы Исторія подкарпаторуськой литературы. Изданіе Регентского Комиссаріята. Унгвар, 1942. Пагиря, Василь: Лука Дем'ян. //Пагиря В. В.: «Я світ узрів під Бескидом» Сторінки історії — Ужгород: Карпати, 1993 — 227 с. Поп, Иван: Демян Лука. //Иван Поп: Энциклопедия Подкарпатской Руси. — Ужгород: Изд-во В.Падяка, 2001. — 431 с. Хланта І. В: Дем'ян Лука Васильович. //Енциклопедія Закарпаття. Визначні особи ХХ століття. Закарпатський осередок НТШ. Під наук. ред. Довганича О.Д. «Гражда». Ужгород, 2007.
Референции
Катеґорія:Украинскы писателе Катеґорія:Русиньскы писателї