Узбекістан (узб. Oʻzbekiston, [ozbekiˈstɒn]), офіціално Република Узбекістан (Oʻzbekiston Respublikasi) є держава в Середнюй Азії. Сосідит из Казахстаном, Кірґізстаном, Таджікістаном, Туркменістаном тай Афґаністаном. Ділит ся на 12 реґіонув и єдну автономну републику, Каракалпакстан.
Перші історичні осадникы днешнього Узбекістана были скіфы, кочовный іранськоязычный наруд, котрый заосновав царьства в Хорезмі, Бактрії, Соґдіані тай иншых реґіонах. Пак сеся теріторія была злучена из Персійов, вєдно з нев была частьов держав Ахеменідув, Сасанідув тай иншых. Уд VII. сторуча ся поширив іслам, зачало ся процвітаня варошув на Шовковум пути, такых як Самарканд, Хіва ци Бухара. По монґолськуй навалі на теперішнюй узбецькуй теріторії зачали доміновати тюркські народы. Змежи тюркськых держав мож уокремити імперію Тімурідув из столицьов у Самарканді и державу Шейбанідув из столицьов у Бухарі. Перебігом XIX. сторуча Середня Азія была поступно залучена в Російську імперію, а єї політичным центром ся став Ташкент. У 1924. році Узбекістан ся появив як совітська република. Независимусть Узбекістана была уголошена 31. авґуста 1991.
Булша часть жителюв сут узбекы подля народности и мусулмане подля реліґії. Узбекістан поступно переходит на рынкову економіку. Важным продуктом выробы и експорта є памут. Окрем того, держава богата на природні мінералы (напр. золото) и земный ґаз.
Катеґорія:Країны Катеґорія:Штаты і теріторії, котры основаны 1991