Еквадор (ісп. Ecuador, [ekwaˈðoɾ]), офіціална назва Република Еквадор (República del Ecuador) є держава в сіверо-западнуй части Южної Америкы. Граничит из Колумбійов на сівері, из Перу на востоці и юзі, из Тихым океаном на западі. В Еквадор западают ай тихоокеанські островы Ґалапаґос.
Теріторія Еквадора была частьов імперії Інкув уд XV. столітя, пак у XVI. столітю была колонізована Іспанійов. Незалежнов ся стала в 1820. році як часть Великої Колумбії, уд 1830. як окремішна держава. Сліды сих історичных подій мож упознати по населеню країны: из 17,1 млн жителюв булша часть сут метисы, а кроме них сут великі меншины потомкув старожителюв, европейцюв и африканцюв. Офіціалный и майпоширеный язык є іспанськый, айбо констітуція споминає ай 13 старожительськых языкув, напр. кечуанськый и шуарськый, котрі «офіціално ся хоснуют для старожительськых народув».
Біолоґічна розмаитость вадь богатство флоры тай фавны Еквадора є майбулша в світі в перечисленю на квадратный кілометер. Економіка силно зависит уд експорта ропы и земледілськых товарув. В період 2006-2016 ся фіксовав спад бідности (из 36,7% жителюв на 22,5%) и руст ГДП на особу (1,5% ручно), айбо вєдно из тым спав ай індекс економічної нерувности.
Катеґорія:Країны Катеґорія:Южна Америка