Cerere (desiñasion de pianeta minor: 1 Cerere) el ze un pianeta nano inte ła fasa prinsipałe de i asteroidi, intra łe orbite de Marte e de Zove. El ze sta el primo asteroide coñosuo, descoverto el 1° de zenaro 1801 da Giuseppe Piazzi da el Oservatorio Astronomego de Pałermo in Sicìłia, e nunsià cofà un novo pianeta. Cerere el ze sta daspò clasifegà cofà asteroide e da ultemo cofà pianeta nano, el uñoło a no pasare oltre ła orbita de Netun.
El diametro de Cerere el ze sirca un cuarto de cheło de ła Łuna. El ga dimension masa picenine par eser visto a ocio nuo, naca co che el ze a el masimo de ła so łuminozità, co ła ecesion de siełi estremamente scuri. Ła so mañitudine aparente ła varia da 6,7 a 9,3, e ła zonze el pico in opozision (co che el ze pi' visin a ła Tera) 'na volta òñi periodo sinodego de 15-16 mei. Drioman, łe so carateristeghe superfisałi łe ze cico vizibiłi anca co i tełescopi pi' potenti e se ga tacà a studiarle soło daspò ła mision de ła NASA de el 2015 co ła sonda spasial robotega Dawn.
I dati so ła gravità i sujerise che Cerere el sia parsialmente diferensià int'un manteło/nucleo fangozo (giaso-rocia) e 'na crosta manco densa ma pi' rezistente conpónesta par un masimo de 30% de giaso in vołume. Siben che Cerere probabilmente no el gabia un osèano interno de acua łicuida, ła sałamoia ła continua a descorer a scavàza el manteło esterno e ła zonze a ła superfise sirca òñi sincuanta miłioni de ani, formando de i criovulcani. Cerere el ga 'na atmosfera de vapor acueo stremaménte fièvełe e tranzitoria, emésa da fonti łogae so ła so superfise.
Notasion
Altri projeti
Linganbi foresti
Categoria:Pianeti nani del sistema sołare